Jee karta hai (II)

Jee karta hai, kuchh gungunaoon, kuchh gaaoon main
Lavz jo kabhi ubhare na ho dil ki gehraiyon se
Naye suron mein, unhe piroh kar
Naya taraana banau main

Jee karta hai, udd udd jaaoon, ambar mein main
Khwaab jo kabhi dekhe na ho raat ki parchhaieyon mein
Neele gagan mein, khud ko hi kho kar
Naya afsaana banau main

Jee karta hai, phir utrun jab, dharti pe main
Boondein jo kabhi nikli na ho aasmaan ke aanchal se
In baadalon mein, unko sang le kar
Nayi barsaatein le aaoon main

Jee karta hai, behti jaaoon, is dariya main
Boondein jo behti aaie, parbaton ke daaman se
Inhi maujon mein, unko dubo kar
Naye kinaare le jaaoon main

Tera saath hua karta tha

Is haath mein mere, tera haath hua karta tha
Har rah mein meri, tera saath hua karta tha

Kya din the mere, kya raatein hua karti thi
Jo chahate meri, sab poori hua karti thi

Hum jab se the mile, sama mehka hua lagta tha
Tum paas the mere, jahan rangeen bada lagta tha

Woh khushiyaan meri, jaane kahan gum ho gayi
O meri dil-nasheen, jaane kahan tum kho gayi

Ab tum nahi mere, to ruswaai hi haath hai
Har rah mein meri, bas tanhaai ka saath hai

Kya khwaab the mere, kya haqeeqat ab baaki hai
Ab dhadkane meri, bas itni dua karti hai

Ab tum jahan raho, sapnon ki wahan mehfil ho
Jis aur tum chalo, khushiyaan hi tumhe haasil ho

Beete hue jo pal, unhe bhoolna bada mushkil hain
Hai aisa yeh safar, jahan dard hi meri manzil hai

Jee karta hai (I)

Jee karta hai, kuch gaaoon, kuch gungunaoon main
Lavz jo kabhi ubhare na ho dil ki gehraiyon se
Naye suron mein unhe piroh kar
Naya taraana aaj banau main

Jee karta hai, bhatak jaoon, rahein bhool jaoon main
Jis makaam tak kabhi khwaab bhi na pahonche ho
In dishaaon ki saheli bankar
Us mazil ka safar apnaoon main

Jee karta hai, kuch sochoon, kuch samajhoon main
Kisi anjaane shayar ki bhooli hui gazal ko
Apne andaaz se padhkar
Naya afsaana jee loon main

Jee karta hai, door kahin, bas behti jaaoon main
Insaani jasbaaton ka jahan basera na ho
Aisi duniya se talash kar
Naye khayal khoj laoon main

Jee karta hai, so jaoon, aisi gehri neend mein
Na saansein chalein, na dil dhadake
Kuch aisa ho us nisha ka asar
Ki wohi savera dobara na dekh paoon main

Humaaraa safar

Nikal pade hain saath-saath
Ek-dusare ka thaame hue haath

Na kisi ek dishaa mein chalnaa hai
Na kisi manzil ki or badhna hai

Bas tay karne hain kuchh raastein
Jo hum khud banaayenge apne vaaste

Is safar ka koi maqsad nahi hai
Sirf saath chalne ka mazaa kaafi hai

Jab raahein banaana apne bas mein ho
To hume hi sochna hain ki wo kaisi ho

Jab khushi paane ka man kare, to unhe khoobsoorat banaayenge
Jab khushi man bhar jaye, to unmein kaante bikher denge

Man kare to peechhe mud jayenge
Ya chaahein to naya mod bana denge

Apni zindagi hum khud jiyenge
Apni maut hum khud marenge

Maut ke baad bhi agar koi safar hota hai
To usmein bhi saath chalna hum pasand karenge

Aap ka asar

Nazaron ke saamne, har waqt, aap hi chhaye rehte ho
Aankhen band kar leti hoon phir bhi aap hi dikhaai dete ho

Khayalon mein mere aaj-kal aap hi base rehte ho
Kuch aur sochna chaahu to bhi aap hi yaad aa jaate ho

Kaanon mein har lamha aapki hasi goonjti rehti hain
Baat koi bhi kar le, awaz aapki sunaai deti hai

Saason ko humaari, jab aapki saansein mehkaati hain
Dhadkanon mein aapki, humaari dhadkanein kho jaati hain

Lahu banke, nason mein humaari, ab se aap hi bahaa karo
Gujaarish hai aapse, wajood ko humaare, yunhi mitaa diya karo

Aap ka khayaal

Jaanu, aapke baare mein sochti hoon, to koi aur khayal nahi rehta
Aapse baat karne ke baad, kuch aur sunne ka man nahi karta

Aankhein band kar loon, to aapki maujoodgi ka ehsaas hota hai
Aapki muskaan jab yaad aaye, wo lamha theher-sa jaata hai

Kitni saari baatein karni hain, sochti hoon, jaane kab milenge
Par itna bhi jaanti hoon, milne par kuch bhi na keh sakenge

Itne faasalon ke baavajood bhi, aap kyu inte kareeb lagte ho
Itne anjaan hokar bhi, aap kyu apne-se lagte ho

Jab se aapko jaana hai, bas aap ki ho chuki hoon
Aapki kitni aarzoo hai, ab tak na keh saki hoon

Aap is tarah se dekha na karo, ek chhoti-si gujaarish hai
Sharm se palkein jhuk jaati hain, tauba, ye kaisi kashish hai

Baatein (II)

Palkein moond lete hi, khwaabon ki barsaat hoti hai
Khwaabon mein tum aate hi, rangeen ye qaaynaat hoti hai

Baatein tumhaari sunte hi, khayaalon mein kho jaati hoon
Khwaabon ke is silsile ko, kuch aur main uljha deti hoon

Uljhanon se hi banti hai khoobsoorat ye zindagi
Warna koi kyu karta kisi khuda ki bandagi

Na jaane kaun-sa jahaan khojte rehtein hain
Hum aur tum, na jaage, na soye rehtein hain

Bematlab ki baatein hain, log to yehi samajhtein hain
Par in baaton ki gehraai, bas, hum dono jaantein hain

Yeh faasle

Aaj ki baat nahi, puraana dard hai
Sadiyon se darmiyaan hai yeh faasle

Ek-doosre to dhoondh to liya hai
Phir bhi qaayam hai yeh faalse

Koshishein kaie kar chuke hai
Mitte nahi hai yeh faasle

Intezar mein jaan nikalti hai
Kitne tarsaate hai yeh faasle

Waqt to haar maan chuka hai
Kyu majboor karte hai yeh faasle

Hum dono to jismon mein qaid hai
Warna yu na sataate yeh faasle

Jismon ko to judaa kar rakha hai
Par roohon ka kya karenge yeh faasle

Kashish

Duniya mein aate hain sab insaan
Liye hisaab mein faaydaa na nuksaan

Jeene ki pehli nishaani hoti hai ek saans
Jiske saath hi aati hai rone ki awaz

Ek nanhi-si jaan jab pehli baar roti hai
Logon ko na jaane kis baat ki khushi hoti hai

Rote-rote hi seekh jaatein hain log hasna
Jaise makdi ke jaal mein keede ka phasna

Bachpan ki masoomiyat mein hoti hain khushi
Umr ke saath beet jaati hai saaree hasi

Duniya ki uljhanon mein kho jaatein hain insaan
Haqeeqat ko bhoolkar bas rehte hain pareshaan

Maut ke saaye mein phir rah jaati hai ek kashish
Khud ko samajhne ki kaash ki hoti koshish

Dil ka soonaapan

Aksar hota hai yeh humaare saath
Kho jaatein hain kahin humare saare jasbaat

Chaahkar bhi lagta nahi kuchh haath
Aur dab jaati hain hothon mein saaree baat

Aankhein bhi kuchh bayaan nahi kar paati
Jaise dil mein kuchh bhi raha na ho baaki

Aise mein bhi ek sukoon-sa milta hai
Kuchh ajeeb-sa yeh ehsaas hota hai

Hothon pe hoti hai phir bhi ek muskaan
Ise paagalpan kahein ya rab ka ehsaan

Nahi doston, yeh nahi hai koi gum
Dil ke is soonepan mein hi sabse khush hai hum

Baatein nazaron ki

Sile hue hothon mein kaie raaz dafn hotein hain
Jhuki hui palak se jo bayaan kiye jaatein hain

Janna chaaho agar daastaan humaare dil ki
Kar lo roshan yeh shamaa apne nazaron ki

Humaari nazaron ke jugnoo bas khinche chale aayenge
Aapki nazaron ko saaree daastaan keh jayenge

Alfaazon ki jahaan koi zaroorat hi nahi
Zubaan ladkhadaane ki gunjaaish kahan rahi

Khayaal to kaie hain jo alfaaz ban na paye
Dar hai kahin aankhon se woh saare chhalak na jaaye

Aap to unhe thaam hi lenge apni hatheli par
Kar gayi humse yeh waada aapki pehli nazar

Baatein (I)

Shaayad hi koi baat hai, jo tumse keh na pau
Jo ankahi bhi tum sun lete ho, tumhe aur kya batau

Shaayad hi koi baat hai, jo tumhaari sun na pau
Par sunne ke liye sochti hoon, na jaane kab mil pau

Samajh to rahi hoon, jo tum kehte aaye ho
Jaanni to wo baatein hain, jo aaj tak keh na paye ho

Baate jo tum kar lete ho, shaayad main nahi kar paati
Par main wo samajh leti hoo, jo tum samjha nahi paate

Tumhe dekha to nahi hai, par itna janna kaafi hai
Sadiyon se milte aaye hain, is baar milna baaki hai

Hum intezar karenge

Din jo dhale, to aap humse mile
Har din yehi hain chahte
Par haath aati hain sirf tanhai
Har shaam dhalte-dhalte

Yoon to miltein hain kitne hi saathi
Unhe nahi hum ginte
Humsafar banayenge aap hi ko
Har rah chalte-chalte

Kehtein hain, zindagi adhoori hai
Bina kisi dilbar ke
Jee lenge hum, akele hi sahi
Agar aap nahi mile

Dil ka bojh utaarna chaahein
Kisi ke saath gum baantke
Par dab jaati hai baat, har baar
Hothon pe aate-aate

Dard jab hadh se gujar jaaye
To aankhon se chhalakta hai
Phir tham jaatein hain apne-aap
Yeh aansoo behte-behte

Palkein sookh jaatin hain
Man soona ho jaata hain
Phir chupke-se jubaan par
Aap hi ka naam aata hai

Dil toot gaya hai, phir bhi
Ummeed to baaki hai
Aapko paane ki aas laati hai
Har saans aate-aate

Galati huie hai humse bhi
Warna aap humse na roothte
Iska hua hai aaj ehsaas
Woh lamhein yaad karte-karte

Duniya ko bhula dein
Chahe khud ko bhool jaaein
Aap dil mein rahenge magar
Har pal, sote-jaagte

Aap kab honge meherbaan humpe
Yeh to hum nahi jaante
Par hum yoonhi karenge intezar aapka
Har roj chupke-chupke

Tum

Kaliyaan jo kabhi khilti hain
Khushboo bankar tum mehekte ho
Subah ki pehli kiran ke saath
Chidiyaa bankar chehekte ho

Saavan ki jab main chaahat karu
Baadal bankar tum garajte ho
Sadiyon se pyase is man mein
Boondein bankar tum baraste ho

Samandar kinaare jab main chalu
Leher bankar tum bikharte ho
Saahil ki ore jab main dekhu
Kasti bankar tum gujarte ho

Andheron ki gehraai mein
Chaand bankar tum chamakte ho
Raat ki is purvaai mein
Nashaa bankar tum behekte ho

Mere jism ki har rag mein
Lahoo bankar tum behte ho
Mere dil mein yun hi har pal
Khayal bankar tum baste ho

Mera Humsafar

Registaan ki tanhaai se gujar rahi thi jab
Tum aaye baadalon ki mehfil saath lekar

Tapti hui dhoop mein jhulas rahi thi jab
Raahat pahunchai tumne baarish ki bauchhaar bankar

Ret ka har daana mujhe chubh raha tha jab
Tumhaare pyaar ki har boond sehlaa gayi marham bankar

Kaanton bhari raahon pe mujhe chalna padaa jab
Aasaan banaaya safar tumne phool bichaakar

Khatre ki aahat se main dar gayi jab
Haunsla badhaaya tumne hameshaa saath nibhaakar

Pareshaaniyon se haar ke main rone lagi jab
Muskaan lautaayi hothon pe tumne ummeedein jagaakar

Meri duniya mein na koi rang the, na koi khushboo thi jab
Jindagi mehkaayi tumne hazaaron rang bikhraakar

Saare jahaan pe chhaaya tha soonepan ka kohraa jab
Is qaaynaat ko haseen banaaya tumne, mera humsafar bankar

Kahani

Saalon pehle ki hain haqeekat
Ek ladki ki, jo thi jaraa-si nat-khat

Duniya se thi woh bekhabar
Masoom-si thi uski nazar

Meethe sapnon mein khoie rehti thi
Hothon pe pyaari-si muskaan rehti thi

Kuch ajeeb-si thi uski aadatein
Karti rehti thi bachkaani harkatein

Ek din ho gayi kuch aisi qayaamat
Sun li usne kisi anjaane ki aahat

Palatkar jab woh dhoodhne lagi
To apne peeche ek parchhaie mili

Nazar uthaakar jo usne dekha
Aankhen uski kha gayi dhoka

Saamne khada tha uska deewana
Jise samajh baithi woh begaana

Aadat se majboor woh ladki
Phir se ek nayi sharaarat kar baithi

Deewane ko bha gayi uski adaayen
Kaisa ye jaadu hum kya bataayen

Ab jaadu to har taraf hota hain
Kaun jaane dil kaise khota hain

Ladki jo deewane se milne lagi
Usike khayaalon mein khone lagi

Uski gali se gujarne lagi
Usike liye ab savarne lagi

Dheere-dheere dono mein pyaar ho gaya
Mile bina jeena dushvaar ho gaya

Ishaar ki thi dono ko chaahat
par inkaar ki thi dono ko dahshat

Ek din ye majboori sahi na gayi
Dono ki jubaan se baat chalak gayi

Tab wahi jaadu phir kar gaya asar
Dono ko mil gayi manzil ki dagar

Unki duniya ko yun abaad karke
Mohabbat chal padi apna paigaam deke

Barish ki har boond

Dilon mein armaan jagaati hain
Mausam to rangeen banaati hain
Barish ki har boond
Bas, jaadu kar jaati hain

Toote rishton ki yaad dilaati hain
Sookhe palkon mein aasu laati hain
Barish ki har boond
Qayamat bhi dhaati hain

Aasmaan se koi paigaam laati hain
Dharti ke kaanon mein kah jaati hain
Barish ki har boond
Dharti aur aasmaan ko milati hain

Murjhaaye paudhon mein jaan laati hain
Sooke hothon pe muskaan laati hain
Barish ki har boond
Humen bhi kuch sikhaati hain

Nadiyon mein baadh laati hain
Sabkuch bahaa le jaati hain
Barish ki har boond
Kisiki duniya bhi ujaadti hain

Kabhi kaaton-si chubhti hain
Kabhi halke-se chhu jaati hain
Barish ki har boond
Kai adaayen dikhaati hain

Chidiyon-si chahekti hain
Choodiyon-si khanakti hain
Barish ki har boond
Sureela geet gaati hain

Patthar pe gire to tootkar bikharti hain
Patte pe mile to aaina ban jaati hain
Barish ki har boond
Sheeshe ki saheli hoti hain

Kaliyon par suhaati hain
Mitti ko mahekaati hain
Barish ki har boond
Aisi niraali hoti hain

Samandar kinaare woh ladki

Samandar kinaare khadi ek ladki
Leheron mein apne kadam bhigoti
Gumsum-si hain nazar, hothon mein koi baat hain dabi
Sadiyon se chupchaap khadi, kisi anjaane ki raah takti

Ujaalon mein kabhi nazar nahin aati
Par shaam ko woh tasveer saaf hain jhalakti
Duniya se hain woh bekhabar, Seene mein koi raaz dafnaati
Kuch aisi hain hasti uski, kisi afsaane ka jaise kirdaar hain lagti

Har shaam, raat mein kho jaati hain
Phir wohi ladki dulhan ban jaati hain
Tab door kahin saahil par, ek aur tasveer hain ubharti
Dekhte-hi-dekhte, ek dulhe mein hain tabdeel hoti

Chaand phir thandi roshi phailaata hain
Aur sitaare baraati ban jaate hain
Sunke apne dulhe ki aahat, woh dulhan kuch hain sharmaati
Dari-sehmi-si woh ladki, hayaa ki moorat hain ban jaati

Dulhaa phir badhtaa hain kinaare ki aur
Baandhne dulhan se apne jeevan ki dor
Phir daaman mein samete, raat ke un sitaaron ki roshni
Apni duniya mein lautne, saahil ki aur woh parchhaiyaan hain badhti

Ye nazaara har raat mein dikhaai padtaa hain
Har savera ise dundhlaa kar jaata hain
Har shaam ko shamaa-si roshan hoti woh ladki
Har subah na jaane kis viraane mein gum ho jaati

Mohabbat kudrat hain

Maa jo bacchon se karti hain, Mehbooba jo aashiq se karti hain
- Mohabbat hain
Gaayak jo suron se karta hain, Chitrakaar jo rangon se karta hain
- Mohabbat hain
Pancchi jo aasmaan se karte hain, Machliyaan jo paani se kartin hain
- Mohabbat hain
Bhanwre jo kaliyon se karte hain, Belen jo pedon se karti hain
- Mohabbat hain

Mohabbat insaanon mein hain
Mohabbat jaanwaron mein hain
Mohabbat ped-paudhon mein hain

Kahan se paida hua ye jasbaa?
Kya mohabbat sikhayi jaati hain?

Os ki boondein jo pattiyon se karti hain
Kya woh mohabbat nahin hain?

Bijli jo ghane baadalon se karti hain
Kya woh mohabbat nahin hain?

Aap chaahe to in sab ko nazarandaaz karen
Par, Kuhda jo apne bandon se karta hai
Woh bhi to mohabbat hain

Aap hi se hain duniya hamaari

Kuch the gile shikve, Kuch thi galatfehmiyaan
Bane the kuch faasle, Mili hamen tanhaaiyan

Utaare na utarta tha, Dil mein jo tha zaher bharaa
Chaaha tha sulah karna, Par jubaan se alfaaz na nikalta tha

Kuch din kya beete tanhai mein, Hum to deewane ho gaye
Zaher ke jharne na jaane kaise, Mohabbat ke samandar ban gaye

Yeh mohabbat kya cheez hain, Kaun jaan paya hain
Kuch log isse anjaan, To kuch log hairan hain

Hum kitna samajh paye hain, Kehna aasan na hoga
Is jasbaat ko lafjon mein qaid kare jo, Mua beimaan woh hoga

Khair, gairon se hamen kya, Hum to aap me bastein hain
Aapki muskuraahat ko yaad karke, Aqsar tanhai mein hanste hain

Khayaalon mein jo kabhi, Aap humein nihaarte hain
Haqeekat mein na jaane kyon, Palak hum jhukaate hain

Kuch is tarah chaaya, Aapke mohabbat ka suroor
Seekh liya humne, Karna khud pe guroor

Suraj ki kirne, Har subah yun jhalakti hain
Mano aapki muskaan, Humare hothon se chalakti hain

Chaand ki halki roshni, Jab raaton ko chamkaati hain
Aapke mohabbat ki khushboo, Hamare tan ko mehkaati hain

Bas ab itni khwaish hain, Aapka haath thaame kuch der chale
Sar pe khula aasmaan ho, Pairon tale ho samandar ki ret

Sadiyaan gujar jayen, Par khatm na raahen ho
Koi juda na kar paye, Aisa hamara saath ho

Ummeed hain ab aap, Humare jusbaaton se waqif hain
Par hum jaante hain, jaankar bhi anjaan banna, aapki aadat hain

Bas itnisi hain kahani humari
Ab to aap hi se hain duniya humari